Færre og færre gifter seg

Tala for inngåtte ekteskap har minka gradvis frå 2008, med unntak av 2012, syner ekteskapsstatistikken. Men tala var endå lågare i perioden  1983–1995. Det var 500 fleire par som skilde seg i 2017 enn det var året før.

Samstundes var det vel 400 færre par som gifte seg i 2017 enn  i 2016. Alle fylka, bortsett frå Østfold, Akershus, Hedmark, Oppland og Troms, hadde ein svak nedgang i talet på inngåtte ekteskap.

Flest likekjønna par gifte seg i hovudstaden

Det var over 330 likekjønna par som gifte seg i 2017. 119 ekteskap var mellom menn og 214 var mellom kvinner. Av desse var det flest som gifte seg i Oslo, 37 prosent, men det var óg mange i Akershus, 12 prosent. Talet på vigslar mellom kvinner har stige kvart år sidan lovendringa som tillet likekjønna ekteskap kom. Det var i fjor 20 prosent fleire slike vigslar enn i 2009 då den nye paragrafen trådte i kraft. Talet på vigslar mellom menn har auka noko mindre, med 13 prosent.