Varekonsumindeksen, juni 2006

Konsumet av varer som høyrer heime i korga "andre varer" gjekk ned med 1,3 prosent i juni. Konsumet av klede, hushaldsartiklar og møblar og kvitevarer gjekk ned, medan konsumet av foto- og datautstyr og fritidsutstyr gjekk noko opp.

Konsumet av elektrisitet og brensel gjekk ned med 5 prosent frå mai til juni, medan konsumet av bilar og bensin var omkring uendra.

I juni var det ein auke i konsumet av mat og drikkevarer. Konsumet låg 0,6 prosent høgare enn i mai. Salet av tobakksvarer gjekk svakt ned.

Dei ujusterte tala viser ein auke i varekonsumet på 3 prosent frå juni i fjor til juni i år. Det var særleg matvarer og "andre varer" som trekte indeksen opp. Konsumet av bilar, bensin og elektrisitet er lågare enn same månad i fjor. Det totale varekonsumet, målt i faste prisar, var 3,5 prosent høgare første halvår i 2006 samanlikna med det første halvåret i 2005.

Anna utrekning enn i detaljomsetningsindeksen

Varekonsumindeksen, som har som mål å talfeste hushalda sitt vareforbruk, vert publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert kjøpte i detaljhandelsnæringa nyttar ein detaljomsetningsindeksen som indikator. I tillegg er varekonsumindeksen rekna ut frå meir enn omsetning - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet. Dette kan føre med seg noko ulik utvikling i dei to indeksane.

Varekonsumindeksen nyttar dei same definisjonane og metodane som kvartalsvis nasjonalrekneskap, og er difor ein indikator for varekonsum i kvartalsvis nasjonalrekneskap. Fordi Statistisk sentralbyrå prioriterer høg aktualitet, må vi i nokre høve nytte førebelse tal, som kan verte endra ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Denne vil seinare verte bytta ut med Statistisk sentralbyrå sin elektrisitetsstatistikk. Dette gjer at det normalt vil vere revisjonar i indeksen for førre periode.