Varekonsumindeksen, mai 2006

Konsumet av varer som høyrer heime i korga "andre varer" auka med heile 3,7 prosent i mai. Det var konsumet av klede og sko som trekte mest opp. Vidare var det ein auke i konsumet av matvarer på 1,7 prosent, samt at kjøp av bilar, bensin og olje gjekk opp med 3,0 prosent frå april til mai.

Konsumet av elektrisitet og brensel gjekk ned med 6,1 prosent frå april til mai.

Dei ujusterte tala viser ein auke i varekonsumet på 6,8 prosent frå mai i fjor til mai i år. Det var særleg "andre varer" som trekte indeksen opp.

Anna utrekning enn i detaljomsetningsindeksen

Varekonsumindeksen, som har som mål å talfeste vareforbruket til hushalda, vert publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert kjøpte i detaljhandelsnæringa nyttar ein detaljomsetningsindeksen som indikator. I tillegg er varekonsumindeksen rekna ut frå meir enn omsetning - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet. Dette kan føre med seg noko ulik utvikling i dei to indeksane.

Varekonsumindeksen nyttar dei same definisjonane og metodane som kvartalsvis nasjonalrekneskap, og er difor ein indikator for varekonsum i kvartalsvis nasjonalrekneskap. Fordi Statistisk sentralbyrå prioriterer høg aktualitet, må vi i nokre høve nytte førebelse tal, som kan verte endra ved neste publisering. Dette gjeld mellom anna elektrisitetskonsumet, der korttidsstatistikken til Noregs vassdrags- og energidirektorat er nytta. Denne vil seinare verte bytta ut med elektrisitetsstatistikken til Statistisk sentralbyrå. Dette gjer at det normalt vil vere revisjonar i indeksen for førre periode.