Varekonsumindeksen, august 2005

Konsumet av mat, drikkevarer og tobakk gjekk ned med 0,5 prosent frå juli til august, visar den sesongjusterte varekonsumindeksen. Medan matvarer og alkoholfrie drikkevarar var uendra frå juli til august, gjekk konsumet av alkoholhaldige drikkevarer ned med heile 4,8 prosent. Dette heng mest sannsynleg saman med dårleg ver i august, som igjen gir lågare konsum av øl.

Varekonsumindeksen viser ein auke på 0,4 prosent i kjøp av bilar, bensin og olje. Her var det òg underkomponentar som trekte i kvar si retning. Medan dei høge bensinprisane har ført til ein kraftig nedgang i konsumet av bensin, heile 4,3 prosent mot månaden før, gjekk salet av personbilar opp med 2,7 prosent.

I august gjekk konsumet av elektrisk kraft og brensel ned med 0,6 prosent. Konsumet av brensel gjekk markant opp, medan konsumet av elektrisk kraft gjekk ned med 2,8 prosent.

Konsumet av varer som høyrer heime i korga "andre varer", gjekk opp med 0,3 prosent frå juli til august. Det var fyrst og fremst konsumet av møblar og kvitevarer samt teleutstyr som trekte opp.

Den ujusterte varekonsumindeksen viser ein kraftig auke i konsumet frå august 2004 til august 2005. Dei ujusterte tala viser ein auke på heile 5,8 prosent i denne perioden. Det var auke i alle konsumgruppene utanom matvarer, drikkevarer og tobakk.

Anna utrekning enn i detaljomsetningsindeksen

Varekonsumindeksen, som har som mål å talfeste hushalda sitt vareforbruk, vert publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert kjøpte i detaljhandelsnæringa nyttar ein detaljomsetningsindeksen som indikator. I tillegg er varekonsumindeksen rekna ut frå meir enn omsetning - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet. Dette kan føre med seg noko ulik utvikling i dei to indeksane.

Varekonsumindeksen nyttar dei same definisjonane og metodane som kvartalsvis nasjonalrekneskap, og er difor ein indikator for varekonsum i kvartalsvis nasjonalrekneskap. Fordi Statistisk sentralbyrå prioriterer høg aktualitet, må vi i nokre høve nytte førebelse tal, som kan verte endra ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Denne vil seinare verte bytta ut med Statistisk sentralbyrå sin elektrisitetsstatistikk. Dette gjer at det normalt vil vere revisjonar i indeksen for førre periode.