Varekonsumindeksen, august 2004

Sesongjustert gjekk konsumet av varegruppene mat, drikkevarer og tobakk og andre varer opp med 1,1 prosent frå juli til august i år. Kjøp av eigne transportmidlar, bensin og olje var 0,6 prosent lågare i perioden, medan forbruket av elektrisitet og brensel gjekk ned med 1,2 prosent.

Den ujusterte varekonsumindeksen var 3,8 prosent høgare i volum i august enn han var i same månad året før.

Ujustert var konsum av mat, drikkevarer og tobakk 0,9 prosent lågare i august 2004 enn i august 2003. I same periode auka kjøp av eigne transportmidlar, bensin og olje med 6,7 prosent. Veksten i konsumet av andre varer gjekk opp med 6,2 prosent frå august i fjor til august i år, medan elektrisitet og brensel viste ein auke på 3,6 prosent i same periode.

Anna utrekning enn i detaljomsetningsindeksen

Varekonsumindeksen, som har som siktemål å talfesta hushalda sitt vareforbruk, publiserast samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert selde i detaljhandelsnæringa nyttar ein detaljomsetningsindeksen som grunnlag, men med ei samanvekting som samsvarer med den delen av omsetninga i næringane som går til forbruk. Dette fører med seg ulik utvikling i dei to indeksane. I tillegg er varekonsumindeksen rekna ut frå omsetning i fleire næringar - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet.

Varekonsumindeksen nyttar dei same definisjonane og om lag dei same metodane som i den kvartalsvise nasjonalrekneskapen, og er difor ein indikator for posten varekonsum i kvartalsvis nasjonalrekneskap. Sesongjustering gjerast for dei einskilde delindeksane. Fordi Statistisk sentralbyrå prioriterer høg aktualitet, må vi i nokre høve nytte førebelse tal som vert erstatta ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Dette gjer at det normalt vil vere revisjonar i indeksen for førre periode.