Varekonsumindeksen, juli 2004

Sesongjusterte tal viser at kjøp av eigne transportmidlar, bensin og olje var den einaste varegruppa som gjekk opp frå juni til juli i 2004, med ein auke på 0,7 prosent. Konsumet av andre varer og konsumet av mat, drikkevarer og tobakk viste ein nedgang på 3,2 og 0,5 prosent i same periode. Sesongjusterte tal viser at konsumet av elektrisitet og brensel hadde ein svak nedgang på 0,2 prosent samanlikna med månaden før.

Den ujusterte varekonsumindeksen var 3,4 prosent høgare i volum i juli enn han var i same månad året før.

Veksten i konsum av andre varer er noko lågare enn den har vore tidlegare. Dei ujusterte tala viser ein auke på 6,0 prosent frå juli 2003 til juli 2004. I same periode gjekk konsumet av elektrisitet og brensel opp med 3,5 prosent, medan kjøp av eigne transportmidlar, bensin og olje auka med 2,7 prosent. Dei ujusterte tala viser at konsum av mat, drikkevarer og tobakk var om lag uendra i juli 2004 samanlikna med same månad året før.

Anna utregning enn i detaljomsetningsindeksen

Varekonsumindeksen, som har som siktemål å talfesta hushaldas vareforbruk, blir publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert selde i detaljhandelsnæringa, nyttar ein detaljomsetningsindeksen som grunnlag, men med ei samanvekting som samsvarer med den delen av omsetninga i næringane som går til forbruk. Dette fører med seg ulik utvikling i dei to indeksane. I tillegg er varekonsumindeksen rekna ut frå omsetning i fleire næringar - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet.

Varekonsumindeksen nyttar dei same definisjonane og om lag dei same metodane som i den kvartalsvise nasjonalrekneskapen, og er difor ein indikator for posten varekonsum i kvartalsvis nasjonalrekneskap. Sesongjustering gjerast for dei einskilde delindeksane. Fordi Statistisk sentralbyrå prioriterar høg aktualitet, må vi i nokre høve nytte førebelse tal som vert erstatta ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Dette gjer at det normalt vil vere revisjonar i indeksen for førre periode.