Varekonsumindeksen, januar 2004

Sesongjustert var konsumet av mat, drikkevarer og tobakk om lag uendra, medan konsumet av andre varer viser ein auke på 1,3 prosent frå desember i fjor til januar i år. Kjøp av eigne transportmiddel, bensin og olje var 0,4 prosent høgare i perioden, medan forbruket av elektrisitet og brensel gjekk opp med 7,4 prosent. Den sterke auken i elektrisitet og brensel heng mellom anna saman med det varme veret i desember og lågare temperatur i januar.

Den ujusterte varekonsumindeksen var 6,5 prosent høgare i volum i januar 2004 enn han var i same månad året før.

Revisjonar i varekonsumindeksen

Statistisk sentralbyrå har ved denne publiseringa lagt til grunn ein oppdatert struktur for samansetninga av varekonsumet. Dette fører med seg revisjonar i indeksane, både i dei sesongjusterte og ujusterte tala.

Anna utrekning enn i detaljomsetningsindeksen

Varekonsumindeksen, som har som mål å talfeste hushalda sitt vareforbruk, vert publisert samstundes med detaljomsetningsindeksen , som er ein omsetningsindeks for detaljhandelsnæringa. Samanlikna med detaljomsetningsindeksen har varekonsumindeksen eit anna innhald. For varer som vert selde i detaljhandelsnæringa nyttar ein detaljomsetningsindeksen som grunnlag, men med ei samanvekting som samsvarer med den delen av omsetninga i næringane som går til forbruk. Dette kan føre med seg noko ulik utvikling i dei to indeksane. I tillegg er varekonsumindeksen rekna ut frå meir enn omsetning - mellom anna nyttar ein tal for førstegongsregistrerte bilar, sal av bensin til bensinstasjonar og ikkje-temperaturkorrigerte tal for forbruk av elektrisitet.

Varekonsumindeksen nyttar dei same definisjonane og metodane som kvartalsvis nasjonalrekneskap, og er difor ein indikator for posten varekonsum i kvartalsvis nasjonalrekneskap. Sesongjustering vert gjort for dei einskilde delindeksane. Fordi Statistisk sentralbyrå prioriterer høg aktualitet, må vi i nokre høve nytte førebelse tal, som kan verte endra ved neste publisering. Dette gjeld mellom anna elektrisitetskonsumet, der Noregs vassdrags- og energidirektorat sin korttidsstatistikk er nytta. Denne vil seinare verte bytta ut med Statistisk sentralbyrå sin elektrisitetsstatistikk. Dette gjer at det normalt vil vere revisjonar i indeksen for førre periode.