Konsumprisindeksen, 15. februar 2008

Konsumprisindeksen (KPI) var 121,9 (1998=100) per februar 2008 mot 117,5 i same månaden i fjor. Dette svarte til ein tolvmånadersvekst på 3,7 prosent, det same som førre månaden. Tolvmånadersveksten i konsumprisindeksen justert for endringar i avgifter og utan energivarer (KPI-JAE) var 2,2 prosent i februar 2008 mot 1,9 i januar.

Dyrare mat og prisoppgang etter januarsal

KPI steig med 0,5 prosent frå januar til februar. Den viktigaste faktoren var ein kraftig auke i prisane på matvarer. Frå januar til februar steig dei med 2,2 prosent, noko som er den høgaste månadlege oppgangen sidan 1982. Dei fleste matvaregruppene hadde prisvekst i februar, men det var særleg stor auke i prisane på brød og kornprodukt, pasta, mjølkeprodukt og oljar og fett, noko som tyder på at dei aukande råvareprisane internasjonalt kan merkast i Noreg òg. I tillegg til matvarer viste fleire andre daglegvareprodukt store prisaukar. Særleg produkt til reingjering og personleg pleie steig mykje.

Januar var prega av salet, medan i februar viste ei rekkje konsumgrupper prisauke. Blant anna gjekk prisane på møblar, teppe og reparasjonar samla opp med 5,1 prosent, og prisane på klede og skotøy auka med 1,7 prosent. Høgare prisar på transporttenester bidrog også til oppgangen i KPI.

Lågare prisar på elektrisitet var den viktigaste dempande faktoren på auken i KPI. I februar fall prisen på elektrisitet inkludert nettleige for fyrste gong sidan august i fjor, og var 6,1 prosent lågare enn i januar 2008.

Elektrisitet viktigast for tolvmånadersveksten

KPI steig med 3,7 prosent frå februar 2007 til februar 2008. Sjølv om elektrisitetsprisane inklusive nettleige fall i februar, var dei 27,9 prosent høgare enn i februar i fjor og det klart viktigaste tilskotet til oppgangen i KPI. Prisane på drift og vedlikehald av transportmiddel steig 9,4 prosent, og prisane på produkt og tenester til vedlikehald og reparasjon av bustad gjekk opp 6,5 prosent. Matvarer og alkoholfrie drikkevarer viste ein prisauke på 3,7 prosent, medan prisane på produkt og tenester til personleg pleie steig med 5,5 prosent.

Dei siste tolv månadene var det særleg tre grupper som bidrog til å dempe veksten i KPI. Prisane på post- og teletenester fortsette å falle, og var i februar 8,3 prosent lågare enn same månaden året før.

For audiovisuelt utstyr fall prisane med 6,6 prosent, medan prisane på klede viste ein nedgang på 3,4 prosent.

KPI utan avgifter (KPI-JA) steig med 3,8 prosent frå februar 2007 til februar 2008.