Konsumprisindeksen, 15. februar 2005

KPI var 113,7 (1998=100) per februar 2005 mot 112,6 på same tid i fjor, ein oppgang på 1,0 prosent. Tolvmånadersveksten i KPI-JAE var 0,7 prosent i februar, uendra frå januar.

Prisoppgang på møblar og matvarer

KPI steig med 0,1 prosent frå januar til februar 2005. Etter sesongsalet førre månad, steig prisane på møblar, innreiings- og dekorasjonsartiklar med 5,1 prosent frå januar til februar og medverka dermed til å trekkje KPI opp.

Prisane på matvarer og alkoholfrie drikkevarer medverka også til oppgangen i KPI med ein prisauke samla sett på 1,0 prosent. I tillegg til ein prisoppgang på sesongvarer, som friske grønsaker og frisk frukt, steig prisane på dei fleste gruppene innanfor matvarer og alkoholfrie drikkevarer.

Prisane knytte til sosiale omsorgstenester steig også sidan førre måling, med ein samla prisoppgang på 0,8 prosent. Dei kommunale barnehagesatsane steig med 1,6 prosent, medan dei private fall med 1,1 prosent sidan august 2004. For meir informasjon om utviklinga i barnehagesatsane, sjå artikkelen "Egenbetaling i barnehager". Endringstall, januar 2005", som blir publisert 11. mars 2005. Det vart også registrert prisauke på eigenbetaling til heimehjelp sidan førre måling i februar i fjor.

Dei tunge energikomponentane bensin og elektrisitet trekte i kvar si retning. Bensinprisane steig med 1,5 prosent frå januar til februar, medan prisane på elektrisitet fall med 6,2 prosent.

Sesongsalet på klede frå førre månad heldt fram i februar, men i langt mindre grad. Biletet var ikkje eintydig, men var prega av ytterlegare prisreduksjonar på ei rekkje produkt, kombinert med prisaukar på andre. Samla sett fall prisane på klede med 1,5 prosent.

Bensin og transporttenester trekte KPI opp

KPI steig med 1,0 prosent frå februar 2004 til februar 2005. Det klart største bidraget til tolvmånadersveksten i februar kjem frå konsumgruppa transport, med prisaukar på bensin og transporttenester på respektive 5,7 og 5,8 prosent. I same retning trekte prisane på biler med ein auke på 1,7 prosent. Det vart også registrert ein kraftig prisauke på reservedelar og tilbehør dei siste tolv månader.

Betalt og estimert husleige medverka også til tolvmånadersveksten i KPI, med prisaukar på respektive 2,1 og 1,8 prosent frå februar 2004 til februar 2005. Det same gjorde prisane på produkt til vedlikehald og reparasjon av bustad, med ein prisoppgang på 5,4 prosent.

Prisane på matvarer og alkoholfrie drikkevarer steig med 1,7 prosent frå februar i fjor til februar i år og medverka dermed også til å trekkje KPI opp.

I motsett retning trekte prisane på elektrisitet med ein nedgang på 10,6 prosent dei siste tolv månader. Prisane på klede og skotøy og audiovisuelt utstyr medverka også til å dempe veksten i KPI med eit prisfall på respektive 6,5 og 6,8 prosent frå februar 2004 til februar 2005.

Nedgang i tolvmånadersveksten

Tolvmånadersveksten i KPI gjekk frå 1,1 prosent i januar til 1,0 prosent i februar. Nedgangen kan mellom anna forklarast med ein prisnedgang på klede i februar i år, mot ein oppgang på same tid i fjor.