Personer med flyktningbakgrunn, 1. januar 1999

Det var 8 100 flyktningar med bakgrunn frå Iran, mens det frå resten av det tidlegare Jugoslavia, Sri Lanka, Chile, Somalia og Irak var mellom 5 800 og 4 500 flyktningar. I talet på vel 67 200 flyktningar er 18 000 personar familiemedlemmer som har blitt sameina med familien. Av dei som var registrerte som hovudpersonflyktning, var 61 prosent asyltilfelle og 22 prosent overføringsflyktningar.

Av dei om lag 67 200 med flyktningbakgrunn, var 52 prosent registrerte med utanlandsk statsborgarskap. Den største gruppa med utanlandsk statsborgarskap var flyktningar frå Bosnia-Hercegovina, 11 200. Flest med norsk statsborgarskap finn vi blant vietnamesiske (8 300) og iranske (5 200) flyktningar. Årsaka til dette er at flyktningar frå Vietnam og Iran har budd så lenge i landet at dei oppfylte krava om skifte til norsk statsborgarskap. Huvudregelen er at ein kan bli norsk statsborgar etter å ha budd i landet samanhengande dei sju siste åra. Dei aller fleste flyktningane fra Bosnia-Hercegovina oppfylte ikkje dette kravet 1. januar 1999.

Det er på bakgrunn av Utlendingsdirektoratets klassifisering av innvandra personar, at Statistisk sentralbyrå har laga ei oversikt over busette personar per 1. januar 1999, personar som ein gong har kome til Noreg som flyktningar eller har familietilknyting til ein flyktning.

Om lag 1/3 bur i Oslo

Det budde flest flyktningar i fylka Oslo, Akershus, Rogaland og Hordaland. Vel 20 000 budde i Oslo, som utgjer om lag 30 prosent av det totale talet på flyktningar i Noreg. Flyktningar i Oslo stod for 3,9 prosent av den totale folkemengda i Oslo. I Akershus budde det vel 6 600 personar med flyktningbakgrunn og i Rogaland og Hordaland i overkant av 5 000. Færrast flyktningar finn vi i fylka Finnmark, Nord-Trøndelag og Troms med mellom 700 og 800 flyktningar.

Samanlikna med året før hadde alle fylka ein auke i talet på flyktningar, forutan Hedmark, Sogn og Fjordane, Sør-Trøndelag og dei tre nordlegaste fylka.

Mange med butid under 10 år

75 prosent av dei med flyktningbakgrunn hadde 1. januar 1999 budd i Noreg 10 år eller mindre. Året før var tilsvarande tal 85 prosent. 22 prosent av flyktningane hadde budd i landet mellom 11 og 20 år, mens berre 2 prosent hadde ei butid på over 20 år.

Tabeller:

• Tabell 1 Ulike avgrensingar av flyktningar, etter landbakgrunn. 1. januar 1999
• Tabell 2 Ulike avgrensingar av flyktningar, etter landbakgrunn. 1. januar 1999