Skatterekneskap, mai 2013

Mai er normalt ein månad med høge skatteinnbetalingar og i år blei det betalt inn til saman 117,1 milliardar kroner. Dette er 6,7 milliardar kroner, eller 6 prosent, meir enn i mai i fjor. Dei største innbetalingane denne månaden kom frå personlege skattytarar med til saman 108 milliardar kroner. Av dette var 45,4 milliardar kroner innbetalingar til folketrygda, medan 27,4 milliardar kroner var fellesskatt til staten og 24,6 milliardar kroner var kommuneskatt. Fylkesskatt og ordinær statsskatt frå personlege skattytarar utgjorde i overkant av 5 milliardar kroner kvar. Upersonlege skattytarar betalte inn 9,2 milliardar kroner i mai og det meste av dette var fellesskatt til staten.

Samla skatteinnbetalingar frå januar til mai er også høgare enn dei var i den tilsvarande perioden i fjor. Til saman er 434,1 milliardar kroner betalt inn hittil i 2013, mot 407,9 milliardar ved utgangen av mai 2012. Innbetalingar frå personlege skattytarar har auka med 7 prosent, til 286,8 milliardar kroner, i den same perioden. Upersonlege skattytarar har hittil i år betalt inn 7,5 milliardar kroner meir enn i fjor. Denne auken kjem av høgare innbetalingar av oljeskatt. Utanom oljeskatten er innbetalingane frå upersonlege skattytarar 3,3 milliardar kroner, eller 4,9 prosent, lågare enn i dei fem første månadene i 2012.