Folkemengde og befolkningsendring, 1. kvartal 2013

Det var vel 18 900 innvandringar og 9 300 utvandringar i 1. kvartal i år, og flytteoverskottet overfor utlandet blei dermed 9 600. Samanlikna med tilsvarande kvartal i fjor var det vel 1 200 færre innvandringar og 2 800 fleire utvandringar.

Mange av dei 9 300 utvandringane, truleg så mange som 3 000–4 000, gjeld personar som har flytta for lengre tid sidan, men ikkje har meldt frå til folkeregisteret. Desse utvandringane har no ”hopa” seg opp i statistikken av di Skatteetaten har ein pågåande opprydding i Det sentrale folkeregisteret som utregistrerer desse personane. Dei siste åra har denne typen opprydding vore vanleg, men den har omfatta langt fleire utvandringar i dette kvartalet.

Det blei født 14 200 barn i 1. kvartal, og 11 400 personar døde. Det er 590 færre fødde og 60 fleire døde enn i fjor. Fødselsoverskottet på 2 800 blei dermed om lag 650 lågare enn førre året, og ein må tilbake til 2005 for å finne lågare tal. Frå 2005 til 2013 har fødselsoverskottet i 1. kvartal variert mellom 2 700 og 4 100.

Folketalet voks mest i Oslo

Oslo skilde seg ut med stor folkevekst i 1. kvartal, både i absolutte tal og sett i høve til folketalet, med ein folkevekst på nærare 3 000. Ikkje langt unna ein firedel av den samla folkeveksten i landet stod Oslo for.

Alle fylka i landet, bortsett frå Telemark og Sogn og Fjordane, hadde folkevekst i 1. kvartal. I fylka Hedmark og Oppland var folkeveksten så liten at folketalet var omtrent uendra frå 1. januar til 1. april.

Oslo og Rogaland hadde det største fødselsoverskottet sett i høve til folketalet. Fem fylke hadde fødselsunderskott. Det var Hedmark, Oppland, Vestfold, Telemark og Nordland. I høve til folketalet var fødselsunderskottet størst i dei to innlandsfylka.

Framleis mange polakkar til Noreg

Av dei med utanlandsk statsborgarskap som innvandra til Noreg, var det framleis flest polakkar. Nærare 3 000 polakkar kom til Noreg i 1. kvartal, som er om lag 500 færre enn i fjor. Dei andre større gruppene som flytta hit i 1. kvartal var litauarar og svenskar, begge med 1 600 innvandringar.

Svenskane stod for flest utvandringar blant dei utanlandske statsborgarane i 1. kvartal med vel 1 000 utvandringar, noko som ga eit flytteoverskott på vel 500. Størst flytteoverskott hadde gruppene med polske og litauiske statsborgarar i 1. kvartal med vel 2 000 og vel 1 300. Etter svenskane var det flest polakkar som utvandra, i alt 950.

Innalandsk flyttetap i mange fylke

Tolv fylke hadde flyttetap til andre fylke. Flyttetapet var størst i Nordland og Møre og Romsdal med respektive 310 og 280 fleire ut- enn innflyttingar. Sett i høve til folketalet hadde Sogn og Fjordane og Finnmark det største innanlandske flyttetapet.

Sju fylke hadde flyttevinst sett i høve til andre fylke i 1. kvartal. Klart størst vinst i høve til folketalet hadde Østfold og Oslo.

Flyttevinst frå utlandet i alle fylka

Alle fylka hadde flyttevinst frå utlandet. I Oslo var samla flyttevinst på 1 400. Rogaland og Hordaland hadde flyttevinst på noko over 1 000 kvar. I høve til folketalet var det Finnmark og Troms som hadde det største overskottet frå flytting over landegrensene.