Norske dotterselskap i utlandet, 2011

Dei norskkontrollerte føretaka i utlandet sysselsette i 2011 251 000 personar og hadde ei omsetning på totalt 1 046 milliardar kroner.

Flest i Sverige

Statistikken viser at 2 312 norskkontrollerte føretak i utlandet, tilsvarande 72 prosent, var lokaliserte innanfor Europa. Europas del av total omsetning og sysselsetting var noko mindre, med høvesvis 59 prosent og 60 prosent. Avhengig av om ein ser på omsetning eller sysselsetting, følgjer høvesvis Nord- og Mellom-Amerika og Asia som dei viktigaste verdsdelane. Sverige var det største enkeltlandet med 700 norskkontrollerte føretak. Norske føretak sysselsette 43 000 personar og omsette for 175 milliardar kroner i Sverige i 2011.

Industri var næringa med flest norske føretak i utlandet. I denne næringa finn ein 930 norskkontrollerte føretak. Desse føretaka sysselsette i 2011 109 000 personar og hadde ei omsetning på 442 milliardar kroner.

Aktivitetsauke

Omsetningsauken frå 2010 til 2011 var på 167 milliardar kroner, medan sysselsettinga auka med knapt 12 000 personar. Den største omsetningsveksten var i næringane industri samt bergverksdrift og utvinning.