Harmonisert konsumprisindeks, juni 2000

Høgare prisar på bensin, selskapsreiser, frukt, grønsaker og auka husleiger medverka til oppgangen i den harmoniserte indeksen frå mai til juni. I motsett retning trekte lågare prisar på elektrisitet.

Høgast prisvekst i Irland, Island, Spania og Noreg

Den harmoniserte konsumprisindeksen for heile EØS-området auka med 0,1 prosent frå april til mai.. Landa som inngår i den Europeiske monetære union (EMU) hadde òg ein oppgang på 0,1 prosent i same periode. Frå mai 1999 til mai 2000 er det Irland, Island, Spania og Noreg som har hatt høgast prisvekst med respektive 5,1, 5,0, 3,2 og 2,9 prosent. I Irland har prisane på utdanning og alkohol og tobakk auka med 14,1 og 13,1 prosent. På Island og i Spania er det spesielt prisane på bustad, lys og brensel og transport som har auka mest. Også i Noreg har prisane på transport auka ein del prosent, men det er prisane på alkohol og tobakk som har hatt den høgaste prisstiginga med 6,9 prosent. I heile EØS-området har prisane på transport auka mest dei siste 12 månadene, noko som synast å kome av oppgangen i prisane på råolje.

Billigare kommunikasjon, klede og sko

I EØS-området har prisane på kommunikasjon, under dette teletakstar og teleutstyr, gått ned med 5,2 prosent frå mai i fjor til mai i år. I same periode har det også vore ein nedgang i prisane på klede og sko på 0,2 prosent. Prisane på klede og sko har hatt størst nedgang i England, Irland og Danmark med respektive 6,3, 4,9 og 4,6 prosent. I Noreg var nedgangen på 2,2 prosent.

Svak prisauke på mat

Det har berre vore ein svak prisauke i konsumgruppene matvarer og drikkevarer utan alkohol og kultur og fritid med ein prisauke på 0,2 og 0,4 prosent i heile EØS-området. Både Frankrike og Nederland har nedgang i prisane på kultur og fritid dei siste 12 månadene, medan Belgia, Danmark, Nederland, Finland og England har nedgang i prisane på matvarer og drikkevarer utan alkohol.