Meir kjøt til middagsborda

Produksjonen av fjørfekjøt auka med 5 800 tonn, og produksjonen av svinekjøt og storfekjøt med respektive 3 000 og 2 000 tonn frå 2015 til 2016. Av den samla kjøtproduksjonen på 344 100 tonn utgjorde svin 40 prosent, fjørfe 29 prosent, storfe 24 prosent og sau 8 prosent.

• Sjå fleire tal og tabellar i statistikken Kjøtproduksjon

Det blei produsert 137 700 tonn svinekjøt i 2016, og 29 prosent av dette berre i Rogaland. Deretter følgde Nord-Trøndelag og Hedmark, kvar med 14 prosent av svinekjøtet. Østfold, Oppland og Vestfold stod kvar for seg for 7 prosent.

Fjørfeproduksjonen er konsentrert til dei 5 fylka Rogaland, Østfold, Hedmark, Nord- og Sør- Trøndelag. I 2016 blei 87 prosent av ein total produksjon på 98 300 tonn framstilt i desse fylka. Rogaland hadde den største delen av fjørfeproduksjonen med 20 prosent, tett følgd av Østfold og Hedmark, med respektive 19 og 18 prosent. Nord-Trøndelag produserte 17 prosent av fjørfekjøtet, medan Sør-Trøndelag sto for 12 prosent. 

Av i alt 81 700 tonn storfekjøt blei 17 prosent produsert i Rogaland. Deretter følgde Oppland med 15 og Nord-Trøndelag med 11 prosent. 

Ein femtedel av i alt 26 000 tonn sauekjøt kom i 2016 frå Rogaland, medan 13 prosent kom frå Oppland. Fylka Hordaland, Sogn og Fjordane og Nordland hadde kvar for seg 9 prosent av sauekjøtproduksjonen.