Skattelikninga (opphørt), 2002

Brutto utlikna skatt var på 385 milliardar kroner, medan frådrag og nedsetjingar i skatt utgjorde 29,5 milliardar kroner. Personar hadde ein auke i utlikna skatt på 7,4 milliardar til 229,2 milliardar kroner i 2002. Samla utlikna skatt gjekk likevel ned då selskapa hadde ein nedgang på 11,8 milliardar kroner. Utlikna skatt for selskapa utgjorde 126,4 milliardar.

Auke i kommuneskatten - nedgang i fylkesskatten

Utlikna skatt på inntekt og formue til kommunane var på 72,2 milliardar kroner i 2002, dette er ein auke på 3 milliardar eller vel 4 prosent frå året før. Utlikna fylkesskatt utgjorde 10,3 milliardar, ein nedgang på 25,4 milliardar frå året før. Grunnen til nedgangen er at skattesatsane mellom kommune, fylke og staten har endra seg. Medan 6,9 prosent av skatt på allmenn inntekt gjekk til fylke i 2001, var denne delen 1,9 prosent i 2002. Tilsvarande satsar for kommune- og fellesskatten var respektive 12,2 og 8,9 prosent i 2001 mot 12,4 og 13,7 prosent i 2002. Berre selskap som produserer elektrisk kraft svarar skatt til kommune- og fylkesskattelikning i form av naturressursskatt. Denne utgjorde vel 1,5 milliardar kroner eller om lag det same som året før.

215 milliardar i utlikna skatt til staten

Utlikna fellesskatt til staten var på 104,7 milliardar kroner medan inntektsskatt til staten var på 108,2 milliardar kroner. Inntektsskatt til staten er i hovudsak toppskatt for personar og sokkelskatt for oljeselskapa, og var på respektive 15,6 milliardar kroner og 92,6 milliardar kroner i 2002. Medan inntektsskatten gjekk ned var det ein auke i utlikna fellesskatt på 27 prosent frå året før. Fellesskatten auka for personar medan det var ein nedgang i fellesskatten for selskapa.

10 milliardar meir i skattefrådrag

I 2002 fekk skattytarane til saman 29,5 milliardar kroner i skattefrådrag, ein auke på nærare 50 prosent frå året før. All auken kjem i hovudsak av auke i godtgjerslefrådraget for personar. For selskapa var skattefrådraga nær uendra samanlikna med 2001 og utgjorde 12,9 milliardar kroner.

Om statistikkgrunnlaget

Statistikken byggjer på uttrekk frå Skattedirektoratet sine likningsregister for personar (forskotspliktige) og selskap (etterskotspliktige).

Tabeller:

• Tabell 1 Oversyn over skattelikninga, etter skattytargruppe og fylke. Bruttoskatt, skattefrådrag og utlikna skatt. Medrekna kontinentalsokkelen. 2002. Millionar kroner
• Tabell 2 Oversyn over skattelikninga, etter skattytargruppe og fylke. Kommune og fylkesskattelikninga. 2002. Millionar kroner
• Tabell 3 Oversyn over skattelikninga, etter skattytargruppe og fylke. Statsskattelikninga samt utlikninga til folketrygda. Medrekna kontinentalsokkelen. 2002. Millionar kroner