Lagerindeks for industri (opphørt), 4. kvartal 2006

Produsentar av oljeplattformer og modular rapporterte om ytterlegare auka lagre i 4. kvartal 2006. Målt i faste prisar var lagra 135,5 prosent høgare i 4. kvartal 2006 enn i 4. kvartal 2005. I løpande prisar var oppgangen på 140,2 prosent i same tidsrom. Lagra av varer i arbeid for denne næringa har stige samanhengande i 2005 og 2006, noko som indikerer eit høgt aktivitetsnivå.

Samla lagerbehaldning i transportmiddelindustrien har også stege frå 4. kvartal 2005 til 4. kvartal 2006. Lagra til næringa var på eit rekordhøgt nivå i 4. kvartal 2006, og det er høgt aktivitetsnivå i næringa i 2006 som har ført til veksten.

Lagra i metallvareindustrien auka ytterlegare i 4. kvartal 2006. Dei var då rekordhøge og 19,0 prosent større enn i 4. kvartal 2005, målt i faste prisar. I verdi var oppgangen i lagerbehaldninga på 23,9 prosent frå 4. kvartal 2005 til 4. kvartal 2006.

Det blei også rapportert om ein auke i lagra for elektronisk og optisk industri i 4. kvartal 2006 samanlikna med same periode året før. Veksten var på 23,3 prosent, målt i faste prisar. Næringa si samla lagerbehaldning var på eit rimeleg høgt nivå. Tilsvarande samanlikning for løpande prisar viste ein auke på 23,0 prosent.