Lagerindeks for industri (opphørt), 4. kvartal 2005

Lagerbehaldninga innanfor kjemikaliar og kjemiske råvarer var svært høg i 4. kvartal 2005, og målt i faste prisar var ho 27 prosent høgare enn i 4. kvartal 2004. Tilsvarande samanlikning i løpande prisar gav ein auke på 28,2 prosent.

Samla lagerbehaldning i transportmiddelindustrien har auka sidan 3. kvartal 2004. Målt i både faste og løpande prisar var lagerbehaldninga over det doble i 4. kvartal 2005 samanlikna med 4. kvartal 2004.

Det var ein auke i lagra i metallindustrien i 4. kvartal 2005, men på grunn av ein reduksjon i 2. og 3. kvartal var lagerbehaldninga lågare enn 4. kvartal 2004.

Reduserte lagre

Samla lagerbehaldning innanfor metallvarer var noko ned i 4. kvartal 2005 samanlikna med 3. kvartal 2005, men var stadig på eit høgt nivå. Målt i volum var næringa si lagerbehaldning 14,5 prosent høgare i 4. kvartal 2005 enn i 4. kvartal 2004. I verdi gav dette ein auke på 19,1 prosent.

Bedriftene har rapportert om reduserte lagre innanfor næringa for elektroteknisk og optisk industri i 4. kvartal 2005.