Lønsoppgjeret gjev auka elektrikarkostnader

Delindeksen for elektrikararbeid steig med 2,1 prosent for bustadblokker, 1,8 prosent for einebustader og 1,7 prosent for rekkjehus frå april til mai 1998. Dette kjem av lønsoppgjeret til elektrikarane.

Dei totale byggjekostnadene gjekk opp med 0,2 prosent i denne perioden. Størst var auken for bustadblokker, med 0,3 prosent, medan auken for einebustader og rekkjehus var på 0,2 prosent. Frå mai 1997 til mai 1998 steig dei totale byggjekostnadene med 3 prosent. I denne perioden var det rekkjehus og bustadblokker som steig mest, med 3,1 prosent, medan einebustadene steig med 2,8 prosent.

Korrigerte tal for april og mai
Alle totalindeksane for april, med unntak av totalindeksen for elektrikararbeid, er korrigerte i høve til tidlegare publiserte tal. I mai er totalindeksane på tidlegare publiserte nivå korrigerte.

Totalindeksane for april og mai er førebelse, og inkluderer tillegget frå årets sentrale lønsoppgjer for stein-, jord- og sementarbeid, tømring og snikring, måling, tapetsering og legging av golvbelegg og røyrleggjar-arbeid. Totalindeksen for mai inkluderer og tillegget frå årets sentrale lønsoppgjer for elektrikararbeid. Viss det endelege lønsoppgjeret i bygg- og elektrikarfaga avvik mykje frå det tilrådde forslaget som byggjekostnadsindeksane for april og mai er regulerte med, vil Statistisk sent-ralbyrå gje ut korrigerte tal for april og mai.

Om statistikken
Byggjekostnadsindeksane måler prisutviklinga til innsatsfaktorane ved bygging av bustader. Indeksane vert og kalla faktorprisindeksar eller «input»-prisindeksar. Byggjekostnadene vert ikkje påverka av endra produktivitet eller endringar i byggmeisteren, entreprenøren eller installatøren sine fortenestemarginar. Grunnlaget for utrekninga er eit utval på 180 representantvarer. I tillegg vert ein del prisar henta frå andre prisstatistikkar som Statistisk sentralbyrå produserer.

Oppgåver til utrekning av indeksane vert innhenta frå eit utval på 320 bedrifter. Dei månadlege utrekningane byggjer på om lag 3 600 prisobservasjonar. Svarprosenten er normalt på 99.

Totalindeksen for byggjekostnader er sett saman av dei tre indeksane for einebustader, rekkjehus og bustadblokker. Vektene som vert nytta er kvadratmeter bruksareal for bustader sette i gang multiplisert med gjennomsnittleg pris i kroner per kvadratmeter bruksareal. Vektene vert endra kvart år.
Tabeller

Tabell 01. Byggjekostnadsindeks. 1978=100

Ny statistikk
Byggjekostnadsindeks, bustader, mai 1998.
Statistikken kjem ut kvar månad i Ukens statistikk og månadsheftet Bygginfo. Meir informasjon og e-post: ase.wilhelmsen@ssb.no, tlf. 62 88 54 61, eller lars.henrik.thingstad@ssb.no, tlf. 62 88 54 97.

Tabellregister

Ukens statistikk nr. 26, 1998 [an error occurred while processing this directive]