![[Forrige artikkel]](/ukens_statistikk/gifs/previous.gif)
![[Innholdsfortegnelse]](/ukens_statistikk/gifs/up.gif)
![[Neste artikkel]](/ukens_statistikk/gifs/next.gif)
|
|
|
Prisane på klede og sko steig med 3,8 prosent frå august til september etter det årlege sommarsalet. Dette var den største årsaka til oppgangen i konsumprisindeksen frå førre månad.
Konsumprisindeksen steig med 0,4 prosent frå 15. august til 15. september 1997. Prisoppgang på klede og sko samt auke i husleiger medverka sterkast til stiginga. Frå september i fjor til september i år steig konsumprisindeksen med 2,3 prosent. Det er det same som i august. Totalindeksen for september var 270,9 (1979=100).
Husleigene viste ein auke på 0,7 prosent i september. Dei hushalda som eig husværet gjennom burettslag opplevde den kraftigaste stiginga. Husleigene for leigde bustader viste berre svak endring. Husleigene går inn i konsumprisindeksen i mars, juni, september og desember.
Eigenbetaling i skulen auka med om lag 6 prosent frå januar til september. Teaterframsyningar har og auka sterkt i pris viser septembermålinga for konsumprisindeksen.
Mindre skilnad mellom Noreg og EU
Harmoniserte konsumprisindeksar for første del av 1997 syner lågare vekst i
prisane siste 12 månader i EU samanlikna med Noreg.
Tala for august syner derimot tendensar til mindre skilnad i prisaukane mellom Noreg og EU. Prisane i Noreg steig med berre 0,2 prosent frå januar 1997 til august 1997, medan prisane i EU auka med 1 prosent i same periode. Veksten i Noreg i denne perioden er den lågaste i EØS-området. Billigare straum er ei av årsakene til den låge veksten i Noreg. Dei andre nordiske landa har saman med Hellas og Storbritannia høgast vekst i EØS-området.
Om statistikken
Konsumprisindeksen sitt prismateriale er faktiske utsalsprisar per den 15. i
månaden. For perioden august 1997-juli 1998 byggjer vektgrunnlaget på
forbruksundersøkingane for 1994, 1995 og 1996.
Grunnlaget for utrekning av konsumprisindeksen er eit utval på om lag 800 spesifiserte forbruksvarer og tenesteytingar - representantvarer. Oppgåver til utrekning av indeksen vert henta inn frå et utval på om lag 2 000 bedrifter. Dei månadlege utrekningane byggjer på om lag 50 000 prisobservasjonar. Svarprosenten er normalt på om lag 95 kvar månad.