Arbeidsløyse blant innvandrarar, 1. kvartal 1998:

Færre arbeidslause innvandrarar

---

Den registrerte arbeidsløysa for førstegenerasjonsinnvandrarar gjekk ned frå 10,5 prosent i februar i fjor til 8,1 prosent i februar i år. Til samanlikning gjekk arbeidsløysa for heile folket ned frå 3,7 til 2,8 prosent i same periode. Størst nedgang i arbeidsløyseprosenten hadde innvandrarane frå Aust-Europa og Afrika.

---

Størst nedgang i arbeidsløyseprosenten hadde innvandrarane frå Aust-Europa, med 4,6 prosentpoeng, og innvandrarane frå Afrika, med 3,9 prosentpoeng, men dei hadde dei høgaste arbeidsløyseprosentane frå før. Innvandrarane frå Asia og Sør- og Mellom-Amerika hadde og ein nedgang i arbeidsløyseprosenten på meir enn 3 prosentpoeng. Statistikken omfattar førstegenerasjonsinnvandrarar.

Medan talet på ikkje-vestlege arbeidslause innvandrarar i prosent av arbeidsstyrken er heile 12,3, har dei vestlege innvandrarane berre nokre tidelar høgare arbeidsløyseprosent enn folket generelt.

Færre på arbeidsmarknadstiltak
Talet på innvandrarar på ordinære arbeidsmarknadstiltak gjekk ned med 1 468 personar frå februar 1997 til februar i år. Det var nedgang for alle innvandrargruppene. Størst nedgang var det for innvandrarane frå Aust-Europa og Afrika. Innvandrarane utgjer no 25,3 prosent av alle personar på ordinære arbeidsmarknadstiltak, mot 21,7 prosent for eit år sidan.

Størst nedgang for mannlege innvandrarar
Arbeidsløyseprosenten for mannlege innvandrarar gjekk ned med 2,8 prosentpoeng frå februar 1997 til februar i år, mens han for menn generelt gjekk ned med 1 prosentpoeng. Størst nedgang i arbeidsløyseprosenten hadde mannlege innvandrarar frå Aust-Europa, med 5,2 prosent-poeng, og mannlege innvandrarar frå Afrika, med 4,5 prosentpoeng. For kvinnelege innvandrarar gjekk arbeidsløyseprosenten ned frå 9,1 prosent i februar 1997 til 7,3 prosent i februar i år, det vil seie ein nedgang på 1,8 prosentpoeng. Til sa-manlikning gjekk arbeidsløyseprosenten for alle kvinner ned med 0,9 prosentpoeng. Nedgangen i arbeidsløyseprosenten var størst for dei kvinnelege innvandrarane frå Sør- og Mellom-Amerika, med 4,1 prosentpoeng, og dei kvinnelege innvandrarane frå Aust-Europa, med 4 prosentpoeng.

Lågast arbeidsløyse i Akershus
Statistisk sentralbyrå reknar og ut registrerte arbeidslause i prosent av alle innvandrarar i yrkesaktiv alder (16-74 år) og ikkje berre i prosent av arbeidsstyrken. Talet på registrerte arbeidslause innvandrarar i prosent av innvandrarar i alt, gjekk mest ned for innvandrarane busett i Telemark og Nord-Trøndelag, begge med 2,3 prosentpoeng. Innvandrarane busett i Nord-Trøndelag har samstundes den høgaste arbeidsløysa blant innvandrarane. Lågast arbeidsløyse i februar 1998 i prosent av innvandrarar i yrkesaktiv alder har dei busett i Akershus, med 3 prosent, og dei busett i Aust-Agder, med 4,3 prosent. Arbeidsløyseprosenten for innvandrarar busett i Finnmark og Sogn og Fjordane var om lag uendra frå februar 1997 til februar i år.

Tabeller