Ved utgangen av 1. kvartal var folketalet 5 633 770 etter å ha auka med 6 370 sidan året byrja. I 1. kvartal i 2025 var auken på 6 700 personar. Den lågare veksten skuldast i hovudsak at det kjem færre ukrainarar til landet. Det viser tal frå statistikken Befolkning.
Fødselsoverskotet, eller forskjellen mellom talet på fødde og dødsfall, auka samanlikna med same periode i 2025.
– I første kvartal vart det fødd 13 680 barn, medan 12 160 personar døydde. Samanlikna med første kvartal i 2025 er dette ein auke i talet på fødde på 580, medan talet på døde var 340 høgare, seier seniorrådgjevar Magnus Haug i SSB.
Færre innvandringar gav lågare folkevekst
Befolkninga veks framleis, men i eit lågare tempo enn dei siste åra. På det høgaste innvandra om lag 14 700 ukrainske statsborgarar i løpet av eitt kvartal. I første kvartal 2026 var talet 3 320. Samstundes utvandra 1 860 ukrainske statsborgarar.
– Folkeveksten har bremsa opp i takt med at færre ukrainarar har flytta til Noreg, seier Haug.
Dermed var første kvartal i år det kvartalet med lågast folkevekst, målt i høve til folketalet, sidan 2004 – med unntak av koronaåret 2020. Folkeveksten var 1,13 per 1 000 innbyggjarar.
Finn tal for din kommune
Under finn du lenker til ferdige tabellar med nøkkeltal for alle kommunar etter fylke:
