I Noreg er det val til både Stortinget og Sametinget, og kommunestyre og fylkesting kvart fjerde år. Valperiodane er ordna slik at det er to år mellom kvar gong det er val. Ved stortingsval er det i hovudsak registrerte parti som stiller til val, medan det er eit stort innslag av lokale lister ved kommunestyre- og fylkestingsvala. Sametingsval vert halde same år som stortingsval.

Oppslutninga ved stortingsval har alltid vore høgare i høve til lokalval. Ved stortingsvalet i 2009 var valdeltakinga på 76,4 prosent - eit prosentpoeng lågare i høve til 2005. Samstundes har berre tre stortingsval etter den andre verdskrigen hatt lågare eller same valdeltaking. Noreg ligg òg under dei fleste nordiske landa i valdeltaking. Ved siste parlamentsval låg Danmark på 86,6 prosent, Island på 85,1 og Sverige på 82 prosent. Berre Finland ligg under Noreg med 65 prosent.

Folkerøystingar har historisk hatt høgare tilslutning enn stortingsval, med ein rekord på 89 prosent i 1994 da Noreg røysta nei til EU-medlemskap. Valdeltakinga ved kommunestyrevala har vore jamt dalande sidan byrjinga på 1960-åra, unnateke av ein liten auke i 1979 og no sist i 2007. Ved fylkestingsvala har deltakinga minka ved kvart einaste val sidan 1975. Det sjette sametingsvalet i 2009 hadde ei valdeltaking på 69,3 prosent - ein nedgong på 3,3 prosentpoeng i høve til valet i 2005.

Kvinnerepresentasjonen ved kommunestyre- og fylkestingsval har vore jamt stigande, og nådde ein førebels topp ved valet i 2007. I kommunestyra er 38 prosent av representantane kvinner, medan det etter stortingsvalet i 2009 er 40 prosent innvalde kvinner på Stortinget. Dette gjer det noverande Storting til det med høgast mengd kvinner nokosinne. I Europa er det berre Sverige som har høgare del kvinner i nasjonalforsamlinga i høve til Noreg. I Sametinget er 49 prosent av representantane kvinner.