Oppgang på Vestlandet

Overnattingsstatistikken syner at det var 4,3 millionar registrerte overnattingar i juni i den kommersielle overnattingstrafikken. Dette er omlag 96 000 fleire overnattingar samanlikna mot same månad sist år. Norske overnattingar auka med 1,7 prosent, medan utanlandske overnattingar auka med 3,4 prosent. Fleire overnattingar frå USA og Tyskland bidrog mest til dette.

Kjelde: Statistisk sentralbyrå.

Vestlandet auka – Agder og Hedmark sank

Dei fire vestlandsfylka, Rogaland, Hordaland, Sogn og Fjordane og Møre og Romsdal auka samla sett med 115 000 målt mot juni 2018. I Rogaland og Hordaland var det først og fremst fleire norske overnattingar, medan i Sogn og Fjordane var det utanlandske. Det var særskild overnattingar frå Sverige, Tyskland og Kina som bidrog til ei auke i Sogn og Fjordane.

I Hedmark, Vest-Agder og Aust-Agder var det ein samla nedgang på 41 000 overnattingar, og det var færre norske overnattingar som førte til ein nedgang i både Vest-Agder og Hedmark. I Aust-Agder var det både færre norske og utanlandske overnattingar. Særskilt var det færre tyske og nederlandske overnattingar i juni i år samanlikna med juni i fjor.

Sterk månad for hotellnæringa

I løpet av juni var det 2,7 millionar overnattingar ved norske hotell, ein auke på heile 4,5 prosent mot juni i fjor. Både dei utanlandske og dei norske overnattingane auka med høvesvis 4,5 og 4,4 prosent.

Oslo, Rogaland og Hordaland hadde den største auka for hotella, og stod for heile 86 000 av dei 116 000 fleire hotellovernattingane. Fylka Vest-Agder og Østfold opplevde derimot ein nedgang målt mot same månad året før.

Liten nedgang på Svalbard

Det var ei jamn auke blant overnattingar på Svalbard i juni månad sidan 2013 og heilt fram til 2018. I år var det derimot ein nedgang på 4,2 prosent. Det var færre overnattingar blant nordmenn som førte til nedgangen. Sidan Svalbard blei innlemma i overnattingsstatistikken i 2013, har det aldri vore registrert så få overnattingar frå Norge på Svalbard i juni. Figuren under syner utviklinga sidan 2013.

Færre hytteovernattingar

• 246 000 overnattingar i juni 2019
• 1,7 prosent færre enn i juni 2018
• Norske overnattingar gjekk ned 2,1 prosent
• Utanlandske overnattingar gjekk ned 1,4 prosent

Færre overnattingar på camping

• 1,3 millionar overnattingar i juni 2019
• Nedgang på 1,1 prosent mot juni 2018
• Norske overnattingar gjekk ned 3 prosent
• Utanlandske overnattingar auka med 2,8 prosent