Oppgang i campingovernattingar fram mot mai

Overnattingsstatistikken registrerer overnattingar på alle norske campingplassar med ein kapasitet på minst 30 einingar. Tala frå januar, februar, mars og april syner at det er nordmenn som stod for auken hjå campingplassane. Norske overnattingar auka med 9 prosent, medan utanlandske overnattingar på campingplassar gjekk ned med 6 prosent samanlikna med året før.   

Norske campingplassar hadde 670 000 overnattingar i 1. tertial. Overnattingar i bubil og på sesongkontraktar auka med høvesvis 23 og 27 prosent, medan overnattingar på campinghytter fall med 11 prosent. Auken i bruken av bubilar i 1. tertial har meir enn dobla seg dei siste tre åra frå 23 000 til 48 000.

Også blant hotella i Noreg var det auke, der talet på samla overnattingar auka med 3 prosent frå same tertial året før. Overnattingar på hyttegrender var om lag uendra, og for vandrarheimar vart det registrert ein nedgang. Samla sett for overnattingsbedriftene i Noreg var det ein 4 prosent oppgang i 1. tertial 2018 samanlikna med 1. tertial 2017.

Størst auke nær skistader og i Trøndelag

Reiseundersøkinga hjå SSB omtalar reiseaktiviteten til nordmenn. Dei nyleg publiserte tala for 1. kvartal i 2018 syner at talet på innanlandsreiser til nordmenn auka meir enn utanlandsreisene deira. Auken i reiseaktiviteten heng saman med at påska fall i mars i år, mot april året før.

Tal frå yr.no viser at  vinteen i år  var av dei meir snørike dei siste åra. Den snørike vinteren er noko som overnattingsstatistikken tidlegare har kommentert. Det kan vere noko av forklaringa på at auken blant campingovernattingane var norske gjester, og at brorparten av auken for campingovernattingane var i område i nærleiken av skistader. Blant dei var det spesielt Oppland som auka mest. I områda rundt skistader, som Beitostølen og Hemsedal, rapporterte også hotell og hyttegrender ein auke i dei første fire månadene samanlikna med i fjor.

Fleire utanlandske overnattingar på hotella

Hotella har sett ein oppgang på 4 prosent i dei fire første månadene av 2018 målt mot den same perioden i fjor, og det var særleg auken i feriereisande som stod for auken. Ser ein på hotellovernattingar fordelte på bustadland, var det auken i hotellovernattingane til nordmenn som bidrog mest til den samla auken, men også overnattingar til utlendingar auka i 1. tertial 2018. Utanlandske overnattingar auka med 8 prosent, der særleg ein 33 prosent auke blant reisande frå USA og ein 12 prosent auke blant tyske reisande bidrog til denne auken.

Trass i den totale auken blei det registrert 4 prosent færre overnattingsgjestar frå både Kina og Storbritannia. Det var spesielt auken i fylka Oslo, Buskerud, Hordaland og Nordland som bidrog til den totale auken for utanlandske overnattingar i Noreg i 1. tertial. Den største prosentvise auken var det Svalbard som registrerte, med 24 prosent fleire utanlandske overnattingar i dei fire første månadene i år samanlikna med i fjor. Sogn og Fjordane hadde den største nedgangen med nesten 6 000, eller 16 prosent, færre utanlandske overnattingar målt mot i fjor.