Stadig fleire føretak nyttar sosiale medium

I samband med undersøkinga Bruk av IKT i næringslivet  er norske føretak mellom anna spurt om bruken av sosiale medium. Sist norske føretak vart spurt om dette var i 2017. Då nytta 72 prosent av føretaka sosiale medium. Dermed held veksten me har sett dei siste åra fram.

I likskap med hushalda er altså næringslivet flittige brukarar av sosiale medium. Nettsamfunn som Facebook og Linkedin er den klart mest brukte varianten av sosiale medium. 76 prosent av føretaka nytta slike sosiale nettsamfunn i 2019, noko som er ein oppgang frå 71 prosent frå 2017. For føretak med minst 100 sysselsette nytta 85 prosent slike sosiale nettsamfunn i 2019.

Føretaks- og mikrobloggar som til dømes Twitter er ikkje like populært. 10 prosent av føretaka svara at dei nyttar dette i 2019. Ikkje overraskande er også her dei største føretaka mest aktive. 26 prosent av føretaka med over 100 sysselsette nyttar slike bloggar.

Næringsgruppa informasjon og kommunikasjon er største brukar

Næringsgruppene handel med og reparasjon av motorkjørety, og informasjon og kommunikasjon er dei som i størst grad nyttar sosiale medium. I begge desse næringsgruppene oppgjev 92 prosent av føretaka at dei nyttar sosiale medium. Bygg og anlegg, og transport og lagring er dei næringsgruppene kor færrast føretak nyttar sosiale medium.

Næringsgruppa informasjon og kommunikasjon er også den klart største brukaren av føretaksblogg og nettsider for deling av multimedieinnhald, kor høvesvis 43 og 41 prosent av føretaka nyttar desse media.

Omdømmeutvikling og rekruttering er dei viktigaste formåla

I tråd med tidlegare undersøkingar er det utvikling av omdømmet til føretaket og føretaket sine produkt, samt rekruttering av nye tilsette flest føretak oppgjev som formål med bruken av sosiale medium. For 2019 oppgav høvesvis 71 og 65 prosent av dei som nyttar sosiale medium at dei nyttar det til desse formåla. Næringsgruppa informasjon og kommunikasjon skil seg særleg ut, kor 89 prosent av dei som nyttar sosiale medium nyttar dette til omdømmeutvikling.