Leverandørindustrien slit framleis

Indeksnivået for industriproduksjonen var på 113,5 (2005=100)  i 3. kvartal 2017 mot 114,3 i føregåande kvartal. Glatta sesongjusterte tal viser ein fallande trend for dei siste tre månadene (sjå figur 1).

Tremånadersendring: fall i leverandørnæringane, vekst i næringsmiddelindustrien

Sesongjusterte tal viser ein liten nedgang i industriproduksjonen på 0,7 prosent i 3. kvartal 2017 samanlikna med det føregåande kvartalet. Det var maskinindustrien, metallvareindustrien og bygging av skip og oljeplattformer som bidrog mest til den samla nedgangen. Andre deler av petroleumsretta leverandørindustri opplevde òg lågare aktivitet denne perioden, og grupperinga hadde samla sett ein nedgang på 3,8 prosent.  For fleire detaljar om korleis petroleumsretta leverandørindustri påverkar industrien samla sjå analysen Norsk Industri 2016 – et krevende år for industrien.

På den motsette sida bidrog vekst i næringsmiddelindustrien og i næringsgruppa gummi, plast og mineralsk industri til å dempe fallet i den samla industriproduksjonen. I førstnemnde næring skyldast auka i sær høgare aktivitet innan foredling og konservering av fisk. Sistnemnde næringsgruppe produserer blant anna innsatsfaktorar til bygg- og anleggsnæringa, og oppgangen kan knytast til høg aktivitet i bygg- og anleggsbransjen i Noreg.

Månadsendring: oppgang i industrien frå august til september

Sesongjusterte tall viser at industriproduksjonen hadde ein auke på 2,6 prosent frå august til september. Det var maskinindustrien, saman med næringsgruppa dataindustri og elektrisk utstyrsindustri samt maskinreparasjon og -installasjon som bidrog mest til auka. Oppgangen må sjåast i samanheng med ein svak august månad.

Tolvmånadersendring: tydeleg høgare produksjonsvekst i eurosona enn i Noreg i august 2017

Kalenderjusterte tal viser at norsk industriproduksjon hadde ein liten auke på 0,2 prosent frå august 2016 til august 2017. Næringsgruppa oljeraffinering, kjemisk og farmasøytisk industri fall mest i denne perioden, medan bygging av skip og oljeplattformer stod for det største positive bidraget.

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein kraftig auke på  heile 4,4 prosent i den same perioden.

Tremånadersendring: auke i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein liten auke på 0,8 prosent i 3. kvartal 2017 samanlikna med det føregåande kvartalet. Veksten heng særskild saman med ein tydeleg oppgang i utvinning av naturgass som auka med 10,4 prosent. Utvinning av råolje gikk på si side ned med 5,6 prosent. For fleire detaljar om olje- og gassproduksjonen i september 2017 sjå pressemelding frå Oljedirektoratet.

Innanfor utvinningstenester var det ei auke i produksjonen på 2,3 prosent i 3. kvartal 2017 samanlikna med føregåande kvartal. Verksemdene innanfor denne næringa vert sterkt påverka av investeringsaktiviteten i norsk  olje- og gassektor, og oppgangen kan knytast til nokre store prosjekter innanfor kategorien feltutbygging.  

Bergverksdrift hadde på si side ein vekst på 2,8 prosent i den same perioden, medan produksjon innanfor norsk kraftforsyning auka med 3,1 prosent.