Aldri har så mange par av same kjønn gifta seg

I det første året med ny ekteskapslov i 2009 blei det inngått 283 likekjønna ekteskap, mens talet altså var 333 i fjor, syner ekteskapsstatistikken.

I dei sju mellomliggjande åra blei det i snitt inngått 270 ekteskap mellom personar av same kjønn.

Vel 64 prosent, av ekteskapa mellom personar av same kjønn i 2017 blei inngått mellom to kvinner.

Når ein ser samla på både dei registrerte partnarskapa (1993–2008) og ekteskapa mellom personar med same kjønn (2009–), var dei fleste partnarskapa/ekteskapa inngått mellom to menn fram til 2006. Frå 2006 var dei fleste inngått mellom to kvinner.

Totalt var det 22 100 par som gifta seg i 2017, ein nedgang på 400 frå året før. Frå 2008, da det var 25 100 par som gifta seg, har talet på vigslar gått ned litt etter litt, bortsett frå i 2012.

Auken i gjennomsnittsalderen for førstegongsgifte held fram

Giftarmålsraten var fortsatt høgast i alderen 30–34 år både for menn og kvinner, og gjennomsnittsalderen for førstegongsgifte var 34,9 år for menn og 32,3 år for kvinner i 2017. Dette utgjer ein auke frå 2016 på 0,3 år for menn og 0,4 år for kvinner. 

9 800 par skilde seg, 10 600 par blei separert

Frå 2016 auka talet på skilsmisser med 500, og talet på separasjonar minka med 250.

Frå 2012 har talet på skilsmisser halde seg under 10 000 kvart år, som er eit lågare nivå enn det var frå 2000 til 2011 da gjennomsnitt var 10 500.

Det var 91 par av same kjønn som skilde seg og 94 par av same kjønn som blei separert.

Framleis låg skilsmisserate 

Skilsmisseraten, som er skilte per 1 000 gifte og separerte av folkemengda, auka frå 2016 og var 10,2 for menn og 10,6 for kvinner i 2017. Skilsmisseraten for både menn og kvinner er noko høgare enn dei tre føregåande åra, men framleis lågare sett i høve til åra 2000–2013.