Sysselsette i kommunal sektor, 2011, 4. kvartal

Talet på tilsette personar i kommunane auka med 2,2 prosent, eller 9 900 sysselsette, frå 4. kvartal 2010 til 4. kvartal 2011. Målt i avtalte årsverk var auken 2,2 prosent.

I fylkeskommunane var det ein auke i talet på tilsette med 1,6 prosent, medan talet på avtalte årsverk synte ein auke på 1,5 prosent frå 4. kvartal 2010 til 4. kvartal 2011.

Den samla sysselsettinga i kommunane og fylkeskommunane auka med 2,1 prosent frå 2010 til 2011, svarande til om lag 10 600 sysselsette, eller om lag 8 400 avtalte årsverk.

Mange tilsette på deltid

Samla var det meir enn 461 000 tilsette personar i kommunane 4. kvartal 2011. Sidan mange arbeider deltid, svarte dette til drygt 354 200 avtalte årsverk. I fylkeskommunane var det meir enn 48 000 tilsette personar og i underkant av 42 000 avtalte årsverk.

Fleire årsverk i barnehagane og i helse- og sosial

For kommunane var det i barnehagane den prosentvise auken i avtalte årsverk var høgast, med 3,1 prosent frå 4. kvartal 2010 til 4. kvartal 2011. I helse- og sosialtenestene var auken på 3 prosent , eller nær 4 400 årsverk.

9 700 årsverk i interkommunale selskap og kommunale føretak

På visse tenesteområde organiserer kommunane verksemda si i interkommunale selskap eller i kommunale føretak. Årsverk knytte til desse er ikkje med i tala som er presenterte ovanfor. I 2011 blei om lag 9 700 årsverk utførte i slike interkommunale selskap eller kommunale føretak. Desse selskapa er mest vanlege innanfor områda vatn, avlaup og renovasjon, og i brann- og ulykkesvern.

2 700 fleire årsverk i pleie og omsorg

Når ein tek med pleie og omsorgstenester som kommunane kjøpte frå andre, auka dei avtalte årsverka for pleie og omsorg med 2,1 prosent frå 4. kvartal 2010 til 4. kvartal 2011 – svarande til nær 2 700 årsverk. Dei private tenestene utgjorde 6,6 prosent av årsverka når ein tel pleie og omsorgstenestene samla, uendra når ein samanliknar med tala frå 2010.

Nær 70 prosent av årsverka i pleie og omsorg vart utførte av personell med helse- og sosialfagleg utdanning. Talet på årsverk i serviceyrke og administrasjon innanfor pleie og omsorgstenestene har halde seg stabilt over fleire år.

Stabil situasjon i fylkeskommunane

Vidaregåande opplæring svarar for over 81 prosent av dei avtalte årsverka i fylkeskommunane. Talet på avtalte årsverk i vidaregåande opplæring endra seg berre med 0,6 prosent siste året.

Tabeller:

• Tabell 1 Avtalte årsverk i kommunane og fylkeskommunane, etter område. 4.kvartal 2005- 2011 (Retta 21. november 2012)
• Tabell 2 Avtalte årsverk og avtalte årsverk eksklusive lange fråver i pleie og omsorg. 2004-2011