Arbeidskonfliktar, 2012

I 2012 vart det registrert 11 arbeidskonfliktar med til saman 41 800 involverte arbeidstakarar. Det var flest tapte arbeidsdagar innanfor helse- og sosialtenester. Her var 25 500 arbeidstakarar involverte. Dette ga eit tap på om lag 252 000 arbeidsdagar, eller 70 prosent av alle tapte arbeidsdagar dette året. Årsaka var den omfattande streiken blant tilsette i kommunane. Også i staten var det omfattande konfliktar i 2012, med tap av om lag 49 000 arbeidsdagar.

I år med hovudoppgjer, slik som i 2012, er det som regel fleire tapte arbeidsdagar enn i år med mellomoppgjer. Det er hovudoppgjer annakvart år, som for dei fleste tariffområda vil seie at det blir inngått toårige tariffavtalar. I år med mellomoppgjer skjer det ein revisjon av dei avtalane som er inngått i hovudoppgjeret. Dette forklarer ein del av dei store endringane i statistikken frå år til år.